රැජින

සීතල දුරුත්ත සිරුර පුරා හී සර විදිමින් පොරෝණය තුළ  ගුලිවෙලා ඉන්න  ආරාධනා කරනවා. එහෙත් සිත උණුසුම්  කල හැකි අපූරු නවකතාවක් තරම් දිව්‍යමය ඔසුවක් මේ හීතලේ තවත් කොහෙන්  හොයා ගන්නද? එක හුස්මට කියවා අහවර කළ 'රැජින' නවකතාව  මෑත කාලයේ මා කියවූ අපූරු සවුන්දර්යාත්මක සිතුවමක්.

ඉතිහාසයයක් ගැන නොවිමසා වර්තමානයක් අනාගතයක් ගැන කෙසේ උදම් අන්නනටද?

එහෙත් ඉතිහාස අටුවා ටීකා වල සත්‍යයට වඩා ප්‍රබන්දයට, ජනප්‍රිය සම්මතයට මුල් තැන දෙන බැවින් අනුලා බිසවට මහා අසාධාරණයක් අපේ ඉතිහාසය විසින්  කර ඇති බැව් රැජින කියවූ ඔබට දැනෙන බව නිසැකයි. අනුලා බිසවගේ හිත ඇයගේ අහිංසක ආදරය සහ සැහසි රාජ පාලනය අතර  විටින් විට දෝලනය වුවත් අවසානයේ ඇගේ ආදරය විසින්ම ඇයව විනාසය කරා ගෙනයනවා. සරල සුගම භාෂාවකින් පාඨක චිත්ත සන්තානයේ සිතුවම් මවමින් මනා ලෙස පබැඳු රැජින ඔබ අනිවාර්යයෙන්ම කියවිය යුතු ආශ්වාදනීය සාහිත්‍ය කතිකාවක්.

එසේම රැජින වෙනුවෙන් නිපදවූ කෙටි චිත්‍රපටය අපේ සාහිත්‍ය නවමු මාවතකට ගෙනයනවා. මොහාන් රාජ් මඩවල සොඳුරු ගත්  කතුවරයා ස්වකීය ග්‍රන්ථයෙන්  ඔබ මා වසර දෙතුන් දහසක් පැරණි අපේ ලක් ඉතිහාසයට මෙන්ම මිසර ඉතිහාසයට කැන්දා සිත් ආනන්දයට පමුණුවනවා.

විමසුම් ඇසින් බලන්න, රස විඳින්න, පරිකල්පනයේ නිම වළලු පුළුල් කරගන්න - කියවන්න රැජින 

ආදර අනිල් අය්යේ

බොහොම සුන්දර පින්තුර සිහිවටනයක් මුහුණු පොතේ අද උදැසනම දැකීමෙන් මගේ දවස සම්පූර්ණ වුණා. 

ඔබත් ඔබේ රාජකාරී මිතුරාත් වචනයේ පරිසමාප්ති අර්ථයෙන්ම බොහොම සුන්දර මිනිසුන්. පරිසර සංරක්ෂණය, වන ජීවීන් ගැන බර වචනයෙන් නන් දොඩවන මහා පරිසරවේදීන් හමුවේ මට ඔබලා පතාක යෝධයන්, මන්ද ඔබලා සිරිපාද නොයිඳුල් රක්ෂිතයේ ගහකොළ, සතා සිව්පාවන්ගේ හදගැස්ම හඳුනන ප්‍රයෝගික මිනිසුන් බැවින්. 

මගෙත් මගේ ගමන් සගයා - දැන් ජීවන ගමන් සගයාගේ නඩේගුරා සංගමයේ  පරිසර හිතැති මිතුරන්ගේ අතීත වැඩසටහන් හැමදාම ආනන්දනීය සිහිවටනයන්. නල්ලතන්නියේ ඔබලාගේ පරණ මුළුතැන්ගෙයි පොලිතින් සුද්දකරන්න ආපු අපේ නඩේ ගුරා කාණ්ඩයේ 30 දෙනෙකුට උයපු සුන්දර මතකයත් හිතේ බොහොම ලස්සනට හැමදාම තියෙනවා. එහෙම උයලා, හැමෝටම බෙදලා ඉවරවෙලා මමත් ඉතුරු වෙච්ච බත් හොදි ටිකක් කෑම උයපු මහා පතරංග වලඳකම  අනාගෙන කෑවා. මෙන්න පැපරාසි අනිල් අය්යා ඇවිත් ඒ චායාරූපය අරගෙන මාව blakmail කරා කියමුකෝ. මෙවන් බොහොම රසබර මතක සාගරයක් සමගින් අපට පමණක් නොව නල්ලතන්නියේ අනිල් අය්යා බොහොමයක් පරිසරයට ලැදි මිතුරන්ට ඇවිදින පුස්තකාලයක් සොඳුරු මිතුරෙක්‌ .

 පරිසරයට, අපේ  දරුවන්ට රටේ දරුවන්ට  නුඹලා කරන මෙහෙය අමිලයි. නිතර හමු නොවුනත් නිතර කතා නොකලත් එදා පැවති බැඳීම එහෙමම හිත් අහසේ පායා තියෙනවා. ඔබ සැමට  ජය වේවා!!!

අපි මචන්

නිදි නැති දෙනෙතට, මනසට සිංහල පැරණි ආදර, විරහ ගීත අම මී ඔසුවක්. පසුගිය කිහිප දිනවල රාජකාරී වැඩ බොහොමයක් නිසා මමයි මගේ පරිගණකයයි ගජරාමෙට වැඩ. ඒ ඇසිල්ලේ අසන්නට ලැබුණු අමුතු තාලයේ නව සංගීත සංයෝජනයක් මා අමන්දානන්දයට පත් කළා. ඔවුන්ගේ සංගීතය සුමටයි, කටහඬ  ගැඹුරුයි එසේම ප්‍රේමනීයයි. ඉඩෝරයට වට මුතු වැස්සක් මෙන් සංගීත කෙත යළි අවදි කරන්නට අපි මචන් සංගීත කණ්ඩායමට,  ඔවුන්ගේ සුයාමයට සුබ පැතුම්.
 

අම්මාගේ ආදර මතක සුවඳ

සැතපුම් ගණනින් සහසක් දුර වුවත් 
නිති දකින්නට වරම් නැති මුත්
සිත නුඹේ ඇහි පිල්ලම යට හැමදාම 
වසරකට එක දවසක් පමණක් කුමටද 
උදා වන හැම දිනක්ම අම්මාවරුන්ගේ දිනයකි 
දුරකතනයෙන් දකිනා නුඹේ ලබැඳි වුවන 
සිහිගන්වයි අපෙ ආදර මතක සුවඳ 

අම්මාගේ උණුසුම් කැදැල්ලෙන් නික්ම මා සෙනෙහෙවන්තයාගේ පතිනිය වී නව කැදැල්ලක් තනන්නට යන්නට පෙර දවසේ මගේ අම්මා මා වෙනුවෙන් කවි පොතක්ම ලියලා දුන්නා. පසුගිය දවසක අපේ අම්මා මා වෙනුවෙන් ලිවූ තවත් කවි පන්තියක් මට ලැබුණා. මට පමණක් නොව අපේ පවුලේ සැම වෙනුවෙන් ඇය කවි කතා පොත් ලියා තිළිණ කර ඇත. එදා මෙදා තුර මා ලද මෙම අමිල තිළිණය කියවා මටත් නොදැනී මහද සියුම් වෙණ තත් කම්පනය වුවා. ආදරය නම් මෙයයි කියන්නට මෙන් මුළු මිහි තලයම නින්නාද කරවන්නා වූ  මගේ අම්මාගේ ආදරය, ඔබේ අම්මාගේ ආදරය; විඳින්නට අවසරයි බෙදා ගන්නට මගේ තිළිණය.
මගේ අම්මා සිරිලක් අධ්‍යාපන ක්ෂේත්‍රයේ දැවැන්ත වෘක්ෂයක් සහස් දු දරුවන්ගේ, දෙමව්පියන්ගේ, ගුරුවරුන්ගේ බුද්ධියේ නිම් වලළු පුළුල් කරන, නමුදු ස්වකීය කුටුම්බයට ඇය අදරැති මවක්, ගෘහණියක්, කිරි සිනා සුවඳ විඳින ආච්චි අම්ම කෙනෙක්. එසේම අපේ ගමේ අවුරුදු උත්සවය, වෙසක් බැති ගී ව වැඩ සටහන්, වැඩිහිටි චාරිකා එකී නොකී බොහෝ දේ සංවිධානය කරන නිසි කළමනාකාරිත්වයද ඇයයි. 

මගේ අම්ම මෙන්ම ඔබේ අම්මාද ඔබේ ජීවිතයේ පරමාදර්ශී චරිතයක් බව නොඅනුමානයි. එසේ නම් බෙදා ගන්න ඔබේ ආදරය සැම විටම ඇයත් සමග.
 කලින් වතාවක මා ඇයට ලිවූ උපන් දින සුබ පතුමක්ද මට හමු වුණා. 

ආදර මල්ලි කොල්ලාට

ආදර  මල්ලි කොල්ලාට,

සිටියත් සත් සමුදුරින් එපිට

නොහැකි වුනත් නිති දකින්නට

සිත නුඹ ගාව හැම ඇසිල්ලෙම 

විසි පස් වසරක් ගෙවී ගිහිල්ලා

අපෙ කෙලි කවට සෙල්ලම් වියැකිලා

මම ඔහුගෙ පතිනිය වෙලා

ඔබ ඇයගේ හිමිකරු වෙලා

නමුදු එදා දුටු මල්ලි කොල්ලා 

තවම මගෙ හිත අස්සට තුරුල්  වෙලා

සිත් අහසේ පැයූ දුල්  සරා සඳ

අදරැති මගේ පොඩි මල්ලි සොඳ

රජත ජයන්ති සමරන සඳ

සුබම සුබ පැතුම් මගේ මල්ලි 

සොඳ

සුපිරි තරු....

සුපිරි තරු තෝරන තරඟ ලංකාවේ වැහි වැහලා. පඳුරකට ගැහුවොත් සුපිරි තරු ගොන්නක් එළියට විසි වෙනවා. එහෙත් අපේ රටේ ඇත්තටම දක්ෂයන්ද නැත්නම්  කෙටි පණිවිඩ වෙළඳාම හොඳින්ම කරන කෙනාව ජනතා පරමාදිපත්‍යට ගරු කිරීමෙන් සුපිරි තරුව ලෙස තෝරෙනවාද කියා පසුගිය වසර කිහිපය පුරාම ඔබත් මාත් හොඳින් තේරුම් ගත්තා නොවේද? අවසානයේ ජයග්‍රාහකයා වන්නේ ජංගම දුරකථන දුරකතන සේවා ආයතනය නොවේද? මෙම යතාර්ථය දැන දැනත් ඔබ  තවම සීනි බෝල සුපිරි තරු වැඩසටහන් නරඹනවා නොවේද? අද මගේ මෙම සටහන මම බෙහෙවින් ආසාවෙන් අන්තර්ජාලයේ නරඹන America's Got Talent, Britain's Got Talent පිළිබඳවයි. ඔබ වරක් නැරඹුවොත් නොනවත්වා නරඹනවා නොඅනුමානයි, මන්ද වැඩසටහන පුරාම අදහාගත නොහැකි දක්ෂතා ඔබට විඳ  ගත හැකියි. සමහර තරඟකරුවන්ගේ පසුබිම් කතා මාහැගි ජීවිත මාර්ග උපදේශන කතා  මාලාවක් ලෙස ඔබට ගත හැකියි. එසේම වයස යනු හුදෙක් අංකයක් පමණක් බව ඔබට මට ගෙනහැර පානවා . තවද විනිශ්චය මණ්ඩලයක වගකීම සහ ප්‍රතිචාර දැක්වීමේ කලාව මැනවින් අවබෝධ වෙනවා නිසැකයි.

එසේනම් පහත සබැඳි වලින් ජීවිතය අහන්න, දකින්න, විඳින්න...

කතා කරන සින්දු

ගීතයක් රස විඳිද්දී  එහි ධ්වනිතාර්ථය, සංගීතය ලේ සම් මස් නහර ඇට මිදුළුවලට දැනේ නම් එය රචකයාගේත්, තනු නිර්පමාපකයගේත්, ගායකයාගේත් අග්‍රගණයේ තුන් ඇදුතු ප්‍රයත්නයක් නොවන්නේද? මේ දිනවල මා බෙහෙවින් රස විඳින සුපිරි නිර්මාණයක්  බෙදා හදා ගන්න හිතුණා. මෙම  ගීතය ඔබට මට කතා කර අපේ මනස්  ආනන්දයෙන් ප්‍රඥාවට ගෙන යන්නක්, මක් නිසාද යත් මුළු ගීතය පුරාම විහිදී ඇති බල සම්පන්න සැඟවුණු අර්ථය නිසා. එසේම මහා සමාජ කතාන්තරයක් ඔබට මට ගෙනහැර පාන්නක්. 

චිත්‍රාල් සෝමපාල අසහාය ගායකයාගේ කට හඬ  විටෙක ප්‍රේමන්විතවද තවත් විටෙක මහා ජව සම්පන්නවද ගීතයට අතිශයින් සාදාරණයක් ඉටු කරනවා. සංගීතය, ගී තනුව එක සේම ගීයට රුකුල් දෙමින් ඔබ මා නවමු ලෝකයකට ගෙන යනවා. ගී තනුවේ  මුල සිට අග දක්වා එකිනෙක කියනා කතාන්තරය විමසිල්ලෙන් අසා රස විඳින්න.

https://www.youtube.com/watch?v=22Siw3QEKoI

ඇහැරෙන්න....

ඇහැරෙන්න ඉතින් දැන්වත් 

ඉඩ දෙන්න  සොඳුරු සිහිනෙන් 

ඇහැරෙන්න.....

මහ වැස්සක ගිනිගත්ත

ඒ ප්‍රේමවන්ත සිහිනෙන්

ඇහැරෙන්න......

දැමුණු සුහික්මුණි

පිළිවෙත් සුරැකුණු

මගේම විජිතයෙහි

මා කිරුල දරා සිටියා

ආදරය ඇවිත් සිහිනෙන්

ඒ කිරුළ සොරා ගත්තා

ඇහැරෙන්න......

මහ වැස්සක ගිනිගත්ත

ඒ නිලංකාර සිහිනෙන්

ඇහැරෙන්න......

ආදරය අකැප හින්දා මම වෙස්වළා සිටියා

දැමුණු සුහික්මුණි

පිළිවෙත් සුරැකුණු

මගේම විජිතයෙහි

මා වෙස්වලා සිටියා

ආදරය අකැප හින්දා 

ඇහැරෙන්න..........

ඇහැරෙන්න කළින් සිහිනෙන් 

මට කියාදෙන්න රහසින් 

කොයි සිහිනෙන්ද කියා

මා ඇහැර 

පලා යන්නේ

මේ මොරසූරන වැස්සේ

ඇහැරෙන්න......

සිහින ගිනි ගන්නා

මේ මොරසූරණ වැස්සේ

මා ඇහැර පලා යන්නේ

කොහේදැයි කියා .......

මට කව්ද කියාදෙන්නේ

කව්ද කියාදෙන්නේ 

ඇහැරෙන්න.....

මහ වැස්සක ගිනිගත්ත

ඒ නිලංකාර සිහිනෙන්

ඇහැරෙන්න.....

මහ වැස්සක ගිනිගත්ත

ඒ  නිලන්කාර සිහිනේ 

ඇහැරෙන්න.....

ඇහැරෙන්න / Wake Up, 

Theme Song from the Movie ' Let her Cry ' by Asoka Handagama, 

Composed and Performed by Chitral 'Chity' Somapala

Music: Amal Alvis

අහනවානම් මෙන්න සින්දු

කවුරු කෙසේ කිව්වත් මට නම් අන්තර්ජාලය යනු මහා පුදුම සම්පතක්. ගූගල් දෙවියන් දැන හෝ නොදැන අපට කරන සේවාව මහා මෙරක් තරම් වටිනවා. පසුගිය දවසක අහම්බෙන් හමුවුන පහත ගී මියැසිය මේ දිනවල අපේ ගෙදර ජාතික ගීය වෙලා. ලංකාවේ බොහෝ දෙනා සිංහල කතා කිරීම ලැජ්ජාවක් ලෙස පුහු මානසිකත්වයෙන්  සලකද්දී විජාතිකයන් අපේ ගීත ගයන අපූරුව පුදුමාකාර මිහිරක් ගෙන දෙනවා. ඇමරිකාවේ බර්ක්ලී සංගීත පාසලේ සිසුන්ගේ සම්මිශ්‍රණයෙන් එළි දකින මෙම ගීතය හේතු කිහිපයක් නිසාම මට හරි අපූරුයි. අපේ ශ්‍රී ලාංකීය නැටුම්, යක් බෙර, ගැට බෙර, සුපැහැදිලි කටහඬ, නාද මාලා  යොදාගෙන   සංගීත සංකලනයේ විශිෂ්ට නිමයුමක් ලෙස අවිවාදයෙන්ම මෙම ගීය ඔබේ මගේ සවන් පිනවනවා. 

අහන්න, විඳින්න පහත සබැඳියෙන් 

https://www.youtube.com/watch?v=oJfZBV0V7NY

Arranger: Shannon Jacob (Sri Lanka)
Lead Vocals: Sanchitha Wickremesooriya (Sri Lanka) & Harshitha Krishnan (India)
Pahatharata Beraya (Yak Beraya): Nalinda Pieris 
Gata Beraya: Uthpala Eroshan
Devil Dancer & Thalampata (Hand Cymbals): Dilhan Pinnagoda
Dancers: Shreya Navile (USA/Boston Conservatory), Carolina Salomon Simon (Mexico/Boston Conservatory), & Madeline Miller (USA/Boston Conservatory)
Voice: Dhruv Goel (India), Ryan LaForrest (USA), Caleb Kishan Savari (Malaysia), Sashank Navaladi (India), Razafindratandra Ny ony (Madagascar), Yaevin Lee (USA), Jenna Kohut (USA), Harshitha Krishnan (India), Wambura Mitaru (Kenya), & Sanchitha Wickremesooriya (Sri Lanka)
Trumpet: Nicholas Alleyne (USA) & Alonzo Ryan, Jr. (USA)
Alto Saxophone: Emery Mesich (USA)
Tenor Saxophone: Chris Allison (USA) & Nicholas Suchecki (USA)
Trombone: Yoshie Nakayama (Japan) & Amanda Fairbank (USA)
Baritone Sax: Gabriel Nekrutman (USA)
Bansuri: Srishti Biyani (India)
Flute: Missy Jaworski (USA)
Kelsey Rogers Violin Durban, South Africa
Kailey Zercher Violin
Santa Fe, NM, USA
Mona Seyed-Bolorforosh Violin

මානව සන්නිවේදන සබඳතා

මම පසුගිය සතියේ  නොසිතූ විරූ අපූරු සිදුවීමකට මුහුණ දුන්නා. ඉතා පොඩි සිදුවීමක් වුවත්  එය මගේ දවස සම්පූර්ණ කළා. අපේ පාසලේ සනීපාරක්ෂක කම්කරුවෙක් වන අල්ලපු රටේ සේවකයෙක් මට ඔහුගේ ජීවිතයේ බොහොම සුබදායි ආරංචියක් පැවසුවා. සෑම වියපත් පියෙකුගේම හීනයක සුබ නිමිත්තක් ඔහු  මා හා බෙදා ගත්තා. මා බෙහෙවින් සතුටු කළ ඔහුගේ වචන ස්වල්පය වුයේ - මට  ඉස්කෝලේ ඉන්න හොඳම  යාලුවා මිස්නේ, ඉතින් මේක මම ඉස්සර වෙලාම කියන්නේ මිස්ට. 

උදේ හවස දැක්කහම ගුඩ් මොනිග් අන්කල් කියනවා හැර, දුටු විට ලෙන්ගතු හිනහවකින් සංග්‍රහ කරනවා හැර ඔහු වෙනුවෙන් වෙන කිසිම උදව්වක් මා ඔහුට කර  නැහැ. හැබැයි මම  ඔහුගෙන්  අඩුම ගානේ සතියකට වතාවක් වත් සැප සනීප, ආගිය විස්තර විමසනවා. මට හිතෙන විදිහට ඔහු මා ඔහුගේ හොඳම මිතුරා ලෙස දකින්න ඇත්තේ මේ නිසා. 

මේක බොහොම පොඩි දෙයක් වුනාට මම දකින විදිහට සවිමත් මානව සන්නිවේදන සබඳතා කියන්නේ මහා බල සම්පන්න ඔසුවක්. මේ ලිපිය කියවා අවසන් වී ඔබත් පොඩ්ඩක් හිතන්න ඔබ අතින් මගහැරෙන පොඩි  දේවල්ම නොවේද අවසානයේ අර්බුද   බවට  පත්වන්නේ කියා. 

ඉතින් මදක් විමසන්න, කරන්න ඔබ අතින් අතපසු වුන පොඩි පොඩි දේවල් ඔබට සහ  ඔබ වටා සිටිනා ඔබේ ආදරනීයයන්ට, සේවකයන්ට, සමාජයට.....

අසා බලන්න වරක් නොව කිහිප වරක්

නින්ද ඇවිත් ආයාසයෙන්  මා සිප වැළඳ ගන්න හැදුවත් රාජකාරී වැඩ නිසා නිදි කුමාරයාට යන්න කියන්න වුණා. විඩා බර නේත්‍රා යුගලටත් වෙහෙසෙනා හිතටත් පොඩි ඉසිඹුවක් දෙන්න හිතලා අන්තර්ජාලය   පැත්තට ගොඩ වැදුණා. අහම්බෙන් අහන්නට ලැබුණු නිතර අසන්න නොලැබෙන මේ සුබාවිත ගී මියැසිය මගේ හදේ ගැඹුරුම තැන ප්‍රකම්පනය කර නෙතට කඳුලක් නංවන්නට සමත් වුණා. 

ඇත්තමයි මට මගේ දෙවැනි අම්මා - මහම්මා (අම්මගේ අක්කා) මේ සින්දුව අසද්දී මා ඉදිරිපිට ඉන්නවා වගේ හිතුණා. මා ජීවිතයේ බොහෝ දේ සමාජය ඇසුරෙන් ඉගෙන ගත හැකි බව පසක් කලේ මගේ මහම්මාගෙන්. අපි බොහෝ දෙනා මිනිසුන් මනින්නේ ඔවුන්ගේ නමට ඉදිරිපසින්, පසුපසින් ඇති උපාදි, සුදුසුකම් වලින් එහෙමත් නැත්නම් බැංකු ගිණුම්වල ශේෂයෙන්, යාන වාහන සහ සමාජ තත්වයෙන්. අපි පිළි ගන්න කැමති වුනත් අකමැති වුණත් වානිජකරණය වූ මේ සමාජයේ කටුක ඇත්ත  එයයි. මගේ මහම්මා මුදලින් පොහොසතෙක් නෙවෙයි, හැබැයි ගති ගුණ සහ මනුස්සකම් වලින් ඇය මට අග රැජිණක්. මගේ මහම්මා වගේ මේ ගීතයෙන් කියවෙන කිරි අම්මා කෙනෙක් වගේ;  අපි හැමෝගෙම ජීවිතවල ආදරණීය චරිතයක් ඔබටත් ඉන්නවා සත්තයි. 

ජීවිතය දෙස උපේක්ෂාවෙන් බලන්නට අත් පොත් තැබුවේ මගේ මහම්මාගෙන්- මෙහි සඳහන් චරිතය කිරි අම්මා වගේ.  අපට යම් දෙයක් අහිමු වුනත් එය තවකෙකුට හිමි වී ඔවුන් විඳින සතුට දෙස බලා සතුටු වන්නට හැකිනම් ජීවිතේ මහා අරුත එයම නොවේද? 

බිම වැටුණු කිරි දතට

හඬන මගෙ ළපටි හිත

අඹ ගහේ ලේනෙකුට දුන්නා

අහිමි වී ගිය දිනෙක

සිනාසිය හැකි හිතක්

අතීතෙන් මට ගෙනත් දුන්නා

මැටි ගෙදර අපේ කිරිඅම්මා

මැටි ගෙදර අපේ කිරිඅම්මා

නාමිකව පොහොසත්, කුල මාන්නයෙන් උදම් වුන එහෙත් දන් දීමට පුරුද්දක් නැති මිනිසුන් සිටිනා සමාජයක ඇසට පෙනෙන නොපෙනෙන සතුන්ට පවා මහැගිව රැකගත් දෙයක් දන් දෙන්නට මේ කිරි අම්ම නොපසුබටයි.

රහත් නමකට නොදෙන

කැවුම් මල්ලක් තියෙන

සිටුවරුන් සිටුගෙදර උන්නා

මා නමින් ගෙයි ඉදෙන

කැවුම් අහුරෙන් එකක්

අඬන කෝදුරුවන්ට දුන්නා

මැටි ගෙදර අපේ කිරිඅම්මා

මැටි ගෙදර අපේ කිරිඅම්මා

කිරි අම්මා වාසය කරන්නේ දුප්පත් මැටි ගෙදරක, එත් මුළු ගමටම දන් දෙන්නට, කුසගිනි නිවන්නට මේ කිරි අම්‌මා පොහොසත්. මට හිතෙන විදිහට අන්තිම පද පෙලෙන් කියවෙන්නේ අද සමාජයේ සියලු සබඳතාවන් ඩිජිටල් වෙලා, මානව බැඳීම් දුරස් වෙලා , එත් අපි තාක්ෂණයත් එක්ක අනු ගත වෙලා- හැබැයි මානව සබඳතා වලින් පිරිහිලා. මෙවන් කිරි අම්මා චරිතයක්  තාක්ෂණික ලෝකයේ කොහෙවත් නැහැ. පුලුවන්නම් හොයා ගන්න. 

මැටි ගෙදර තිබුණු තැන

ගමක කුසගිනි නිවන

කිරි එරෙන ගහක් වැඩ ඉන්නා

වෙබ් අඩවියේ තැ‍නෙක 

හමුවුනොත් දන්වන්න

මැටි ගෙදර අපේ කිරිඅම්මා

මැටි ගෙදර අපේ කිරිඅම්මා

.

පද - රජී වසන්ත වෙල්ගම

සංගීතය - ප්‍රසාද් සිරිවර්ධන

ගායනය - කරුණාරත්න දිවුල්ගනේ

ලයාන්විත මියැසි ස්වරයෙන්,  අරුත් බර පද වැලින් සිත් විල නින්නාද කළා වූ ඔබේ ජීවිතයට සමීප මෙවැනි කිරි අම්මා කෙනෙක් ගැන සඳහන්  මේම ස්වර සන්ධවනිය බෙහෙවින් සංවේදීය. අසා බලන්න, විඳින්න  වරක් නොව කිහිප වරක්.

https://www.youtube.com/watch?v=RfHF4VL1mUo

ඉතින් ආයුබෝවන්!

නෙලුම් වලක් නෙලුම් විලක් කරන්නට වෙනස ඉස්පිල්ලකි.
2003 වසරේ මුණගැසුන ඔහුගේ මා ඇසු පළමු කතාව මෙයයි.
දහතුන් වසරකට පසු ඔහු සමු ගන්නා දවසේ මගේ අවසාන කතාවේ පූර්විකාවද එයයි.
මහගු වෙනසක් උදා කළ මුල් ගුරුතුමනි සොඳ, 
ඉතින් ආයුබෝවන් යලි මුණ ගැසෙන තුරා .......

ඕමානයේ සිරි ලක් විදුහලේ මුල් ගුරු සෝමබන්දු කොඩිකාර මහතාට සහ ආදරබර නාලිනී කොඩිකාර මැතිණියට සුබ ගමනකට සුබ පැතුම්!

අපේ හයේ පහර!!!

අදින් සය වසරකට පෙර 
ජය මංගල අෂ්ටක බෙර හඬින් 
රන් කෙන්දෙන් අතැඟිලි එක් කරලා 
නුඹේ සොඳුරු මනාලිය ලෙසින් 
අපි අපේ වුනා මතකයි අදරින්. 
සුපුරුදු සෙනෙහෙ කැදැල්ලට සමු දී ..
ඔබේ අත ගෙන දිවි මං තලාවේ
පියනගන්නට සතුටින්
එක්වූවා සෙනෙහෙ සිතින්
දසකයකුත් සිව් වසරකුත් ගෙවිලා
ඔබ මා දැන හඳුනාගෙන
එදා දුටු මගේ සොඳුරු මිතුරා
දැන් මගේ සුහදානන් වෙලා
ආදරේ නම් මහ මෙරක් මැයි
අකුරු අමුනන්නට නොහැකී
රන් රස සේ එක් වෙලා
එදා මෙන් හැමදාමත් ආදරෙන්
පිය නගමු අපි සන්තොසින්...
HAPPY ANNIVERSARY HUBBY!

ආදර අක්කා

පවුල් බැඳීමක කොඳු නාරටිය මට හිතෙන විදිහට නම් පවුලේ ලොකු අක්කා. එකිනෙක ආවර්ජනය කරනවානම් ලියා නිම කරන්නන්ට නොහැකි තරම් රසබර මතක ගෙනහැර දක්වන්නට පුළුවන්. හොඳම මතකයක් නම් මම පොඩිම කාලේ අක්කා මට කිව්වා අකුණු ගහද්දී යකඩ වලට ඒවා ඇද ගන්නවා, ඒක නිසා යකඩ ළඟ ඉන්නවත් එපා. මගේ වෙලාව කියන්නේ දවසක් හෙන ගගහ වහිද්දී මම ඇඳගෙන හිටියේ යකඩ ගාන්චු තියෙන කොට කලිසමක්. අක්කගේ උගත් පාඩම් කොමිසම කෙතරම් මගේ ඇට මිදුළු වලට ගිහින්ද කියනවානම් ඒ වෙලාවේම මම කලිසම ගලවලා විසි කලානේ. කොහොමද අපේ අක්කගේ අකුණු සන්නායක විද්‍යා පාඩමේ තරම. පොඩි කාලේ ඇණයක් විදිහට හිතුනත් දැන් හිතෙනවා ඒ සොඳුරු ළමා වියේ මතකයන් නිසාම නොවේද අපි ආදරෙන් තාමත් ජීවත් වෙන්නේ කියා. 
මේ පුංචි සිතිවිල්ල ඒ මතකයන් වෙනුවෙන් .....

 2015-04-22

                                                                                 2016-04-22

අපි මොනවද කළේ?

කිසිදා දැක නැති එහෙත් බ්ලොගය නිසා මා හඳුනාගත් හිතවතුන් මගේ නිර්මාණ අගය කරද්දී දැනුන සතුට යලි විඳගන්නට මගේ සුබ කතා බ්ලොගය පණගන්වන්නට මට හිතුනා.  දිගු නිහැඬියාවකට පසුවුණත් හිතට දැනෙන, විඳින වස්තු බීජයන් ඔබ හා බෙදාගන්නට යලිත් අවසරයි.

ළඟකදී නින්දත් නොනින්දත් අතර ඉන්දෙද්දී මට හරි අපූරු සිතිවිල්ලක් පහළ  වුණා. අප අසා ඇති ඉතිහාස කතා වල දුටුගැමුණු රජතුමාට මරණාසන්න මොහෙතේදී සිහිපත් කරන්න පින් පොතක් තිබිලා තියෙනවා. ඒ කියන්නේ එතුමා කළ හැම යහපත් කටයුත්තක්ම පින් පොතේ සටහන් කරලා තියෙනවා. ඉස්සර වගේ දිනපොත් දැන් පාවිච්චි කරන්නේ නැති නිසා මට හිතෙනවා මුහුණු පොතේ පින්තූර සටහන් සහ සොඳුරු මතකයන් හැර අප කළ කිසිවක් වාචිකව සටහන් වෙන්නේ බොහොම අඩුවෙන් කියා.  රාජකාරී කටයුතු නිසා ලංකාවෙන් බොහෝ දුර බැහැරව මමත් මගේ සංචාරක ගමන් සගයත්(දැන් ඔහු මගේ ජීවන ගමන්මගේ සගයා) හිටියත් එදා ලංකාවේ ගිය චාරිකා තවම සිතේ සක්මන් කරන නිසා මතු යම් දවසක අපේ දරු මුණුබුරන්ට කියන්නට රස ගමන් විස්තර සටහන් කරන්නට මට හිතුනා. අපේ බොහෝ සංචාරක සටහන් පහත සබදියන්වල තිබුනත් සියල්ල එක පිටුවක ගලපන්නට මගේ උත්සාහයයි.

http://www.nadegura.com/sinhala/

http://www.nadegura.com/trips/

https://www.youtube.com/results?search_query=nadegura

ඉදිරියට ඒවා විස්තරාත්මකව ගෙනෙන්නත් මෙම ගමන් වලදී අපට හමුවූ  සොඳුරු මිනිසුන්, මතකයන්  ගැනත් පෙලගස්වන්නට ඉදින්  අවසරයි!

අපේ කඳු තරණයන් සහ සංචාර කිහිපයක්

• පිදුරුතලාගල 
• කිරිගල්පොත්ත - දෙවරක් 
• තොටුපොල කන්ද - දෙවරක් 
• සමනල ගිර - මාර්ග සතරකින් සතර වරක් 
• ග්‍රේට් වෙස්ටර්න් 
• කොනිකල් හිල් 
• සිංගල් ට්‍රී හිල් 
• නකල්ස්, දෝතළුගල  
• ගොන්ගල 
• හන්තාන 
• බෝම්බුරු ඇල්ල 
• වන්ගෙඩිගල - බඹර කන්ද 
• බැරන්ඩිගල, සේර ඇල්ල - මාතලේ
• ඩෙල්ෆ්ට්, යාපනයේ සංචාරය 
• විල්පත්තු, තම්බපන්නි ගමන 
• ලෝකාන්තය - සුපුරුදු පාර සහ නග්රක් බංගලාවෙන් ඉහලට 
• හත්මලේ ඇල්ල - දෙනියාය 
• සිංහරාජය දෙවරක් 
• කොත්මලේ සංචාරය 
• මොණරගල 
• රාක්ෂගල 
• යක්දෙස්සගල 
• කබ්බලේ කන්ද -කන්නෙලිය
• මානිගල 
• රිවර්ස්ටන්    
• මීමුරේ 

හිරුනිකා vs ගම්මන්පිල්ල

මේ දවස්වල මුහුණු පොතේ උඩ පහළ යද්දී අහන දකින ඒවා නිසා අමුතුවෙන් කොමඩි චිත්‍රපටි බලන්නට කිසිදු අවශ්‍යතාවයක් නැත. අපේ ජුගුප්සාජනක දේශපාලනයේ කළු සුදු සිද්දි දාමයක් ඉන්දියානු මෙගා නාට්‍යයක් මෙන් නොමිලයේ  දිගහැරෙමින් පවතී. විටෙක සිංහයා තවත් මොහොතකින් බලු වෙයි. එසේම බලු චරිතය මොහොතින් සිංහ චරිතයක් වෙයි. දේශපාලකයන්ගේ ප්‍රතිපත්ති කෙසේ වෙතත් ඔවුන්ගේ පැටිකිරියම එක මොහොතකින් උණු උණු පුවත් මවයි. තවත්ලොකුම විහිළුවක් වන්නේ ඔවුන් කන බොන අඳින පළදින විලාශය සංසන්දනය කරමින් කරනා දේශපාලනයයි.

 "ඈත බිකිනියකින් යාන්තම් වැසී ගිය හිරුණිකා යැ... මෑත සිංහල ජාතික ඇඳුමෙන් සැරසී සිටින ගම්මන්පිලයන් යැ."
"ඈත කාමයෙන් මත්වැ ගිය යවටක් වැනි ඇස් ඇති හිරුණිකා යැ... මෑත තම ඡන්ද දායකයන්වත් තම දරුවන් සේම දකින කාරුණික ගම්මන්පිල යැ."
"ඈත රුපියල් ඩොලර් වලට තම ශරීරය පමණක් නොව ආත්මය පවා විකුණන හිරුණිකා යැ... මෑත තනතුරු තානාන්තර පවා අතහරිමින් ප්‍රතිපත්තිය වෙනුවෙන් පෙනී සිටින ගම්මන්පිල යැ."
"ඈත මගේ තාත්ති, තාත්ති වෙනුවෙන් මම ඈ කියමින් තාත්තාව විකුණන් කන හිරුණිකායැ... මෑත තම ප්‍රතිපත්ති ප්‍රකාශය පවසමින් මතවාදීව කරුණු දක්වන ගම්මන්පිළ යැ."
"ඈත බැලු බැලූවන් ගොං කෑල්ල, බඩුව යයි කියැවෙන හිරුණිකා යැ. මෑත බැලු බැලූවන් ජයවේවා! තෙරුවන් සරණයි! යැයි කියවෙන ගම්මන්පිල යැ."
"එවේලෙහි හිරුණිකා ලංවත්ම ඡන්ද දායකයෝ ලෙයෙහි අත්ගසන්නට වන්හැ... හෝව් හෝව් වැරදුනා, අත්ගසන්නට වන්හැ. බලාසිටියැ නොහෙම්හ යි මුහුණින් හෙන්නට වන්හැ."
- හිරුණිකා දමනය -

මෙය අද මුහුණු පොතේ දුටු හොඳම විහිළුවකි. එයට සම්බන්ද  කර තිබූ පින්තුර ඊට හපන් විහිළුවකි. හිරුනිකාගේ හෝ ගම්මන්පිල්ලගේ දේශපාලන සදාචාරය පිලිබඳ මම සඳහන් නොකරන්නේ එය මේ දිනවල යහමින් කරලියේ දිග හැරෙන බැවිනි. එහෙත් තරුණ ස්ත්‍රියක් සහ මැදි වයස් පිරිමියෙක් අවස්ථා දෙකකදී ගත්  සේයා රූ ඔවුන්ගේ ඇඳුමින් සසඳා කරන දේශපාලන විහිලුව කෙතරම් හාස්‍යජනකද ? හිරුණිකා බිකිනියක් ඇන්දේ එක්සත් රාජධානියේ තරුණ නිරුපන තරගයකටය; මෙම අවස්තාවම තරුණ ගම්මන්පිල්ලට මීට දශක කිහිපයකට පෙර උදාවුනානම් ඔහුද 6 පැක් පෙනෙන ලෙස යටි කය පමණක් අගල් කිහිපයකින් වැසෙන කලිසමක් අඳිනු ඇත. මෙය හරියට සිංහල සදාචාරය දඩමීමා කරගෙන සුසන්තිකා ඔලිම්පික් අඳින බිකිනිය දෙස සාවද්‍ය දෘෂ්ටියකින් බලා ඇය විවේචනය කිරීමක් හා සමාන අවස්ථාවක් නොවේද? හිරුණිකාගේ අවස්ථාවට, වයසට, සිරුරේ හැඩයට උචිත ලෙස ඇඳීම දෙස වපරැසකින් බලා ඇයගේ දේශපාලනය විවේචනය කිරීම කෙතරම් මන්ද මානසිකත්වයකින් කරන්නාවූ  බාල බොළඳ ක්‍රියාවක් නොවේද? අප කවදානම් මෙම පටු මානසිකත්වයෙන් මිදී නිදහස් චින්තනයකට ගමන් කරයිද ?

සිය රට දේ සිරි සැප දේ...

අපේ වත්ත පහළ කොස් ගස් වලින් නොමිලයේම අපේ මුළු ගමටම කොස්, පොලොස්, වරකා, වැල ගෙඩි සපයනවා. දානයකට, මගුල්  ගෙදරකට, මළ ගෙදරකට, දොලදුකකට, වන්දනා ගමනකට, විශේෂ කෑමකට ආදී එකී නොකී බොහෝ අවශ්‍යතා උදෙසා තුන්සිය හැටපස් දවසම අපේ ගමේ කොස් ගස් පොදු වස්තූන්.  ඒ විතරක්  නෙවෙයි අච්චාරුවකට, මැල්ලුමකට ගමේ පැපොල් ගස් ඕනැම මොහොතක ඕනෑම හිතවතකුට විවෘතයි. ගෙවත්තේ ඉබේ වැවෙන ගොටුකොළ,  මුකුණුවැන්න, සාරණ, තම්පලා, නිවිති වගේ එකී නොකී බොහෝ එළවලු, පලතුරු, පලා වර්ග අදටත් අපේ ගම්වල කිසිදු සාත්තුවකින් තොරව සත පහක්වත් නොගෙන ඔබ අප සැමගේ ක්ෂුදාගින්න සනහනවා. 

මා මේ පූර්විකාව ලියන්නේ කාලයක් තිස්සේ අනේ අපොයි කියමින් කරන  නොවැලක්විය හැකි වියදම් නිසයි. විදෙස් ගතව සිටින අපට අපේ රටේ එළවලු පලතුරු බොහොම අගෙයි. සුපිරි  වෙළඳසලේ අපේ පොලොස්, දෙල්, තිබ්බටු, කොහිල, ගොටුකොල, මුකුණුවැන්න, වරකා, වැල් දොඩම් දකිද්දී ඇතිවෙන්නේ කලක පටන් දන්නා හඳුනන හිතවතෙකු දුටුවිට දැනෙන ලෙන්ගතුකමක්. මමත් ඉතින් බොහොම ආසාවෙන් මේවා ගන්නවා. අරගෙන අපේ විදිහට උයා  පිහා ගන්නවා. එහෙත් ඉතින් අස්ප ගණන්. මේ තියෙන්නේ එහෙම ගත්ත අපේ ගණනින් රුපියල් 285ක් වන පොලොස් රාජෝත්තමයෙක්, රු 146 කට ගත්ත වැල් දොඩම් ගෙඩි තුනත්, රු 350 ගත්ත පැපොල් කුමාරිත්. වරකා මදුළු 10ක් රු 350 වගේ වෙනවා. මේවා දැක්ක මුල්ම දවස්වල මට හිතුනේ අපේ වත්ත පිටියේ දේවල් මෙහාට වික්කනම් අපි දැන් ට්‍රිලියනපතියෝ නේද කියා.අපේ ගස් වල තියෙද්දීම  සත්තුන්ට දන් දෙන, ගස් යට ඔහේ නරක්වන කොස්, වරකා , වැල ගෙඩි දකිද්දී මෙහෙම අනිවාරතේ අපේ දේවල් වලට වියදම් කරද්දී දුකයි තමා, හැබැයි කීයක් දීලා හරි අපේ ලාංකීය අම රස බොජුන් වලදද්දී දැනෙන සතුට මිල කළ නොහැකියි.

 සිය රට දේ සිරි සැප දේ කියන්නේ කට කහනවට නෙවෙයි නේ... 

   

 නන්දා මාලිනියගේ භාවාතිශය ගීතයක් වන හීනෙන් මගෙ රටේ නිදියන හැම රෑම . . මේ මොහොතේ සිහිපත් වෙනවා. අඩු වැඩි වශයෙන් එය ඔබ අප බොහෝ දෙනාගේ පොදු සිතිවිල්ලක් නොවේද ?

http://www.youtube.com/watch?v=Q0fv5L99BQ4

විලක් උනත් නිල් දිය පිරි විලක් නොවේ -  මලක් උනත් සුවඳක් ඇති මලක් නොවේ

සඳක් උනත් පසලොස්වක සඳක් නොවේ - රටක් උනත් මගෙ රට වැනි රටක් නොවේ

නෑවත් වතුර මල යට ඉඳ නළ වතුර - තාමත් සිතින් කිමිදෙමි ගගදිය අතර

කීවත් ගීත මැදපෙරදිග මරු කතර - කාටත් හොරෙන් කියවෙයි පැල් කවි නිතර

සායෙන් හඬන දූ දරුවන් උදෙසාම - ආයෙම් මෙහෙවරට නොරටුන් ලඟ මෙහෙම

බානෙන් බැඳී සිටියත් යදියන් සේම හීනෙන් මගෙ රටේ නිදියන හැම රෑම . . !!!

සමන් දෙවි හාමුදුරුවනේ...

සුබාගේ සුබ කතා නම් මගේ බ්ලොගයේ මම  පළ කරන්න හිතුවේ සුබ කතා විතරයි. එහෙත් අද මුහුණු පොතේ දුටු සේයාරු දෙකක් නිසා නිසල  සිත මොහොතකට  සසල වුණා. සුමන සමන් දෙවියන්ගේ සිරිපා අඩවිය කරුණාව  ඔබ අප සියලු දෙනාට  වචනයෙන් පැවසිය  නොහැකි අපූර්ව  අත්දැකීමක්. සිරිපා මලුව වාරයේ මෙන්ම අවාරයේද මාර්ග කිහිපයකින්ම කරුණා කර බෙහෙවින් සුන්දර මතක රැසක් පොදී බැඳගෙන මම ඉන්නේ. එමෙන්ම වාර්ෂික පොලිතින් ඉවත් කිරීමේ පුණ්‍ය කර්මයටද  දායක වී හිත පහදා ගෙන ඉන්නේ. නල්ලතන්නියේ මකර තොරණ අසබඩ අනිල් අය්යාගේ වන ජීවී කාර්යාලය අපේ    නිවහන වුනේ වරක් දෙවරක් නොවේ. වරක් එහි සිට උඩ  මලුව දක්වාම සීතලේ ගැහෙමින් සුළගෙන් වැස්සෙන් මදි නොකියන්න බැට කමින් ජංගම දුරකතනේ එළියෙන් කරුණා කරපු අන්දම තාමත් මතකයි. ලංකාව පුරා විසිරී සිටින වයස්, ජාති, ආගම් සීමා මායිම්  නොමැතිව බැතිමතුන් සීත ගඟුලින් නාලා පිරිසිදු වෙලා හද බැතියෙන් කරුණා කරන්නේ.  එත් මොන දුක් ගැහට විඳගෙන හරි උඩ  මළුවට ගියාම ගතට සිතට දැනෙන ශාන්තිය අමුතුම හැගීමක්. ඉර සේවය පහන් සිතින් නරඹා මුළු මලුවම එකම සාදු කාරයෙන් නාද වෙද්දී දිව්‍යලෝක දසුන් හාත්පස නරඹමින් ඔබ අප සිත් ආනන්දයෙන් කුල්මත් වෙනවා සත්තකයි.

සිරිපා වාරය ගිය සතියෙන් ඇරඹුනා. මැජික් ක්‍රමයකින් කුණු ඉවත් කිරීමේ නවතම වැඩසටහනකුත් දකින්න පුළුවන් මෙවර සිරිපා කරුණා කළාම. මේවා ක්‍රියාත්මක කරන අයගේ උපතින් මොලය හිසේ පිහිටියාට දැන් නම් පශ්චාත් භාගයට බැස ඇති බව පැහැදිලියි. එසේම වෙනදා නොදුටු විස්සුක දසුනක් උඩ මළුවට ඇතුලුවෙන තැන මෙදා පාර තියෙන හැඩය්. එක දැකලා තමයි මම දැනගත්තේ සිරිපා මළුවට බුදු රදුන් පමණක් නොව මිහිඳු මහා රජාත් ජනාදිපතිවරනයට වැඩල කියල.  පක්ෂ, පාට බේදයකින් තොරව අපේ මිනිස්සු කවදාද සිතින් අධ්‍යත්මිකව දියුණු වන්නේ. 

මේවා දැක්කහම අපි අසරණ වෙලා වගේ සිතට දැනෙනවා සමන් දෙවි හාමුදුරුවනේ...

සිහින සොලොසක් මැද....

දඹදිව රාජ්‍ය විචාල කොසොල් රජතුමා නියම රාජ්‍ය පරිපාලකයෙක් බව බොදු ඉතිහාස  පොත් පත සාක්කි දරනවා. දවසේ රාජකීය මෙහෙවර නිමාකර සිරි යහනේ සැතපිලා නිදි සුව විඳිනා සිටිනා විට දුටු අමුතු හීන සහ ඒවාට  බුදු රදුන් දුන්  අර්ථ කතන බොහෝ දෙනෙක් අසා ඇති. කලකට පෙර සහෘදයකුගෙන් ලද විද්‍යුත් තැපෑලකත් තිබුණ අද මුහුණු පොතේ උඩ  පහල යනවිටත් දුටු විස්තරාත්මක සිහින දහසය ඔබ අප සැමගේ දැනුවත් වීම පිණිස පල කරන්න හිතුනා.  එසේම එක්තරා අන්දමකට මෙම සිහින දහසයම විසි හතර පැයම ඔබ අපි අහනවා, දකිනවා, විදිනවා නොවේද? මෙම අපූරු පින්තුර සිත්තම් කළ සහ පලකළ පුද්ගලයන්ට පින්!.