සැතපුම් ගණනින් සහසක් දුර වුවත්
නිති දකින්නට වරම් නැති මුත්
සිත නුඹේ ඇහි පිල්ලම යට හැමදාම
වසරකට එක දවසක් පමණක් කුමටද
උදා වන හැම දිනක්ම අම්මාවරුන්ගේ දිනයකි
දුරකතනයෙන් දකිනා නුඹේ ලබැඳි වුවන
සිහිගන්වයි අපෙ ආදර මතක සුවඳ
අම්මාගේ උණුසුම් කැදැල්ලෙන් නික්ම මා සෙනෙහෙවන්තයාගේ පතිනිය වී නව කැදැල්ලක් තනන්නට යන්නට පෙර දවසේ මගේ අම්මා මා වෙනුවෙන් කවි පොතක්ම ලියලා දුන්නා. පසුගිය දවසක අපේ අම්මා මා වෙනුවෙන් ලිවූ තවත් කවි පන්තියක් මට ලැබුණා. මට පමණක් නොව අපේ පවුලේ සැම වෙනුවෙන් ඇය කවි කතා පොත් ලියා තිළිණ කර ඇත. එදා මෙදා තුර මා ලද මෙම අමිල තිළිණය කියවා මටත් නොදැනී මහද සියුම් වෙණ තත් කම්පනය වුවා. ආදරය නම් මෙයයි කියන්නට මෙන් මුළු මිහි තලයම නින්නාද කරවන්නා වූ මගේ අම්මාගේ ආදරය, ඔබේ අම්මාගේ ආදරය; විඳින්නට අවසරයි බෙදා ගන්නට මගේ තිළිණය.
මගේ අම්මා සිරිලක් අධ්‍යාපන ක්ෂේත්‍රයේ දැවැන්ත වෘක්ෂයක් සහස් දු දරුවන්ගේ, දෙමව්පියන්ගේ, ගුරුවරුන්ගේ බුද්ධියේ නිම් වලළු පුළුල් කරන, නමුදු ස්වකීය කුටුම්බයට ඇය අදරැති මවක්, ගෘහණියක්, කිරි සිනා සුවඳ විඳින ආච්චි අම්ම කෙනෙක්. එසේම අපේ ගමේ අවුරුදු උත්සවය, වෙසක් බැති ගී ව වැඩ සටහන්, වැඩිහිටි චාරිකා එකී නොකී බොහෝ දේ සංවිධානය කරන නිසි කළමනාකාරිත්වයද ඇයයි.
මගේ අම්ම මෙන්ම ඔබේ අම්මාද ඔබේ ජීවිතයේ පරමාදර්ශී චරිතයක් බව නොඅනුමානයි. එසේ නම් බෙදා ගන්න ඔබේ ආදරය සැම විටම ඇයත් සමග.
කලින් වතාවක මා ඇයට ලිවූ උපන් දින සුබ පතුමක්ද මට හමු වුණා.
No comments:
Post a Comment